Noon, ang ating bansa ay naghihirap dahil sa mga dayuhang sumasalakay dito at para agawin ang teritoryo. Ang mga tao ay nagsasakripisyo at nagpapakahirap upang lumaban lamang  para sa kanilang minahal na bayan. Sila ang naging mga bayani natin sapagkat sila’y nagpakamatay para sa kalayaan at kapayapaan ng ating bansa. Sa kasalukuyan, naging mas maunlad na ito. Marami na ang natatanggap sa mga malalaking kompanya at nagkakaroon ng mga magagandang trabaho dahil sa edukasyon at teknolohiya. Halos lahat ng mga lugar sa bansa ay nagiging lungsod na dahil sa malaking populasyon  at sa mga matitibay na mga imprastraktura. Ang ganda na ng ating bansa, ano? Pero kahit anong kaganda o kaunlad nito,  napapansin ko pa rin sa aking palibot, napagtanto kong nasa kritikal na kalagayan ang ating bansa. Malalang malala ang kondisyon ng ating lipunan. Mga kawatan,  kidnappers, sindikato, rapist, rebelde, at mamatay-tao. May iba pa diyan na nagbebenta ng kanilang sariling katawan at gumagamit ng mga illegal na druga. Karamihan sa mga tao ay hindi na mapagkakatiwalaan. Sino nga ba ang nararapat nating sisihin dito? Ang gobyerno ba? Sa palagay ko, hindi. Dahil, hindi lamang sila ang kumikilos para sa ating bansa. Tayo rin. Kaya tayong mga mamamayan ang dapat sisihin. Sa katunayan lamang, tayo ‘yung kumikilos. Tayo ‘yung gumagawa ng mga masasamang bagay kagaya ng krimen at tayo rin ang nagpapalaki sa suliraning ito lalong lalo na sa mga kabataan ngayon.  Nakikita naman natin hindi ba na karamihan sa kanila ay naglalakad na lamang sa kalye, nanlilimos, mga gutom at walang natitirhan. Mahirap ang kanilang buhay marahil dahil  kulang sa pag-aalaga at gabay ng kanilang mga magulang o di kaya ay iniwan na. Nasaan na nga ba ang kasabihang sila ang pag-asa ng ating bayan? Paano mag-uunlad ang bansa natin kung ganito ang sitwasyon ng lipunan ngayon? Bilang isang mag-aaral, mapapaaayos ko ang kalagayan ng aking bansa kung mag-aaral ako ng mabuti. Tayo ay bahagi ng lipunan kaya huwag tayo maging makasarili. Magtulungan tayo at gawin natin kung ano ang tama at  nararapat at kung ano ang ating makakaya. Ito ay maging isang paraan para magkaroon ng maayos at matibay na lipunan.